Nag-viral sa social media ang facial expression ni Sen. Imee Marcos habang pinangungunahan ni Sen. Risa Hontiveros ang panalangin sa Senate plenary session nitong Lunes, Agosto 24.
Kumalat online ang isang clip na kuha sa reaksyon ni Marcos habang isinasagawa ni Hontiveros ang panalangin.
Dahil dito, umani ng iba’t ibang komento at interpretasyon mula sa mga netizen ang naging ekspresyon ng senadora, na mabilis na naging viral sa social media.
Iginiit ni Sen. Robin Padilla na puro umano kasinungalingan at personal na pambabatikos ang ibinabato sa kanya ng kanyang mga kritiko dahil wala silang mahanap na tunay na isyu laban sa kanya.
Aniya, nauuwi na lamang umano sa pagtawag sa kanya ng “bobo” at “tanga” ang mga batikos.
“Humanap naman kayo ng totoong ibabanat n’yo sa akin. Puro kasinungalingan eh. Kasi wala kayong mahanap na butas sa akin.”
Dagdag pa ni Padilla, wala umano siyang kinalaman sa pagnanakaw.
“Pero pagdating sa pagnanakaw, zero ako!”
Ang pahayag ay binitiwan ni Padilla bilang tugon sa mga patuloy na kritisismo laban sa kanya.
Nanindigan si Sen. Robin Padilla na hindi dapat pigilan ang pagpasok ng mga dayuhang investor sa Pilipinas, kasunod ng mga usapin sa Pax Silica.
Ayon kay Padilla, ginagawa rin umano ito ng mga karatig-bansa tulad ng Singapore, Vietnam at Malaysia upang makahikayat ng mga dayuhang mamumuhunan.
“Hindi ko maintindihan kung bakit itong Pax Silica ay ginagawang issue. Dapat yan ay pinapayagang pumasok at magnegosyo sa atin. Dapat hindi pigilan.”
Ipinaliwanag ni Padilla na ang pagpasok ng mga dayuhang investor ay hindi nangangahulugang sasakupin ang bansa.
“Hindi po ibig sabihin na sasakupin tayo. Kung tayo ay sasakupin, ako po ang unang lalaban diyan.”
Binanggit din ng senador ang kanyang naging posisyon sa isyu ng International Criminal Court (ICC), kabilang ang alegasyong siya umano ang tumulong sa pagtakas ni Sen. Ronald “Bato” dela Rosa, na kanyang itinanggi.
“Nung tayo ay sinasakop ng ICC, ako ang lumaban diyan. Ginawan pa ako ng issue na pinatakas ko daw si Bato. Hindi totoo yun.”
Sa huli, binigyang-diin ni Padilla ang umano’y epekto ng mga investor sa ekonomiya at trabaho:
“Tandaan po ninyo, pag merong investor, may trabaho. Pag may trabaho, may sweldo.”
MANILA — Unang inilatag ng House prosecution panel nitong Lunes ang isang hostile witness sa impeachment trial ni Vice President Sara Duterte—si Gina Acosta, dating special disbursing officer (SDO) ng Office of the Vice President (OVP).
Bukod sa kanyang tungkulin bilang SDO na may mandato umanong mag-disburse ng confidential funds ng OVP noong 2022 at 2023 alinsunod sa Joint Circular 2015-01, matagal na ring may kaugnayan si Acosta sa mga tanggapan na pinamunuan ni Duterte.
Sa pag-aalok ng kanyang testimonya bilang ebidensya ng private prosecutor na si Amando Ligutan, lumitaw na empleyado pa rin si Acosta ng OVP, kung saan hawak niya ang ranggong Vice Presidential Staff 6.
Bago siya naging SDO ng OVP, nagsilbi rin si Acosta bilang SDO ng Davao City government noong alkalde pa si Duterte mula 2019 hanggang 2022.
Mula 2016 hanggang 2022, naging staff member din siya ng Davao City Administrator’s Office at Davao City Budget Office—mga taon na nagsilbi si Duterte bilang alkalde ng lungsod.
Sa pagtatanong ni Senate impeachment court presiding officer Francis Escudero, sinabi ni Acosta na ang kanyang termino bilang OVP official ay coterminous sa termino ng Vice President, na nakatakdang magtapos sa Hunyo 30, 2028.
Sa ika-16 na araw ng impeachment trial, sinabi ni Acosta na P500 milyon na confidential funds ng OVP noong 2022 at 2023 ang kanyang inilabas at ipinagkatiwala kay Colonel Raymund Lachica, na noo’y opisyal ng Vice Presidential Security and Protection Group.
Ayon kay Acosta, si Lachica lamang umano ang may alam kung paano ipatutupad ang mga confidential activities.
“Yes, Your Honor. Siya (Lachica) lang ‘yung may alam on how to implement ’yung confidential activities,” ani Acosta.
Ipinaliwanag din niya na hindi trabaho ng isang security officer ang paghawak ng confidential funds, kundi ng disbursing officer. Gayunman, matapos niyang i-release ang pera kay Lachica, sinabi niyang si Lachica ang pumipirma bilang tumanggap nito at nagbibigay sa kanya ng utilization report.
Hindi ito ang unang pagkakataong nagsalita si Acosta tungkol sa pag-release ng confidential funds kay Lachica.
Sa isang House inquiry noong Nobyembre 2024, sinabi ni Acosta na si Duterte mismo ang nagbigay ng go-signal para ma-turn over kay Lachica ang P125 milyon na confidential funds ng OVP noong 2022.
Nang tanungin ni House justice panel chairperson at Batangas Rep. Gerville Luistro kung ano ang naging batayan niya sa pagbigay ng malaking halaga kay Lachica, sumagot si Acosta:
“May approval po kay Ma’am Inday Sara.”
Ipinaliwanag din niya kung bakit niya pinagkakatiwalaan si Lachica.
“I trust Sir Lachica po kasi tina-trust po siya ng aking head of [OVP] office na si Ma’am Inday Sara [Duterte],” ani Acosta.
Itinuturing na hostile witness si Acosta sa kasalukuyang impeachment proceedings, kahit siya ay dating SDO ng OVP at nananatiling empleyado ng tanggapan.
Sa kanyang mga testimonya, naglahad si Acosta ng mga detalye tungkol sa kanyang naging papel sa pag-release ng confidential funds at sa mga taong tumanggap at gumamit nito—mga paksang sinusuri ngayon ng Senate impeachment court bilang bahagi ng paglilitis laban kay Duterte.
Ang kanyang testimonya ay kabilang sa mga pangunahing isyung tinututukan ng prosecution kaugnay ng paggamit at paghawak sa confidential funds ng OVP.
MANILA — Inamin ni dating special disbursing officer (SDO) Gina Acosta na hindi niya alam kung bakit siya kinuha ni Vice President Sara Duterte bilang SDO noong alkalde pa ito ng Davao City at kalaunan ay sa Office of the Vice President (OVP).
Sa pagdinig ng Senate impeachment court nitong Lunes, tinanong si Acosta kung bakit siya ang napili para sa naturang posisyon, lalo na’t umabot sa P500 milyon ang confidential funds ng OVP na ipinagkatiwala sa kanyang pagdi-disburse.
“Hindi ko alam, Your Honor, kung bakit ako ang kinuha ng Bise Presidente as SDO [ng OVP at Davao City],” sagot ni Acosta.
Tinanong siya tungkol dito ni private prosecutor Amando Ligutan at Senate impeachment court presiding officer Francis Escudero kaugnay ng kanyang mga naunang pahayag sa nagpapatuloy na impeachment trial ni Duterte.
Hindi eksperto sa confidential operations
Bilang prosecution hostile witness sa ika-17 araw ng impeachment trial, sinabi ni Acosta na hindi siya eksperto sa confidential operations.
Inamin din niya na siya ang nag-disburse ng P500 milyong confidential funds ng OVP para sa 2022 at 2023 kay Colonel Raymund Lachica, security officer ng OVP.
Gayunman, lumabas sa pagdinig na ipinagbabawal umano ng 2015-01 Joint Circular ang naturang paraan ng paghawak at pag-disburse ng confidential funds.
Ayon din kay Acosta, hindi naman kinakailangan ng naturang joint circular na magkaroon ng background sa confidential operations ang isang SDO.
Nang tanungin tungkol sa kanyang educational background, sinabi niyang nagtapos siya ng Customs Administration.
Ano ang tungkulin ng isang SDO?
Sa ilalim ng 2015-01 Joint Circular, ang SDO ay ang head of agency o regular employee na itinalaga ng head of agency upang mangasiwa sa pagdi-disburse ng confidential o intelligence funds at maging accountable sa mga ito.
Nakasaad din sa joint circular na ang mga disbursement ng confidential at intelligence funds ay dapat suportado ng documentary evidence of payment na nakalagay sa sealed envelope, pirmado ng SDO, at dapat panatilihing nakatago sa vault sa kanyang opisina.
Nauna nang sinabi ni Acosta sa impeachment court at sa House justice committee, na nagsagawa ng mga pagdinig kaugnay ng impeachment complaints laban kay Duterte, na ipinag-disburse niya kay Lachica ang P500 milyong confidential fund allocation ng OVP alinsunod umano sa mga utos ni Duterte.
‘Ginagawa ko lang ang trabaho ko’
Dahil dito, muling tinanong ni Ligutan at Escudero si Acosta kung siya ba ay kinuha bilang SDO ng OVP at ng Davao City noong panahon ni Duterte bilang alkalde dahil palagi niyang sinusunod ang mga instructions ng Vice President.
Muli, sinabi ni Acosta na hindi niya alam.
“Hindi ko alam, Your Honor. Basta ginagawa ko lang ang trabaho ko na pagiging SDO,” ani Acosta.
Sa gitna ng paglilitis, patuloy na sinusuri ng prosecution ang naging proseso ng paghawak at paggamit ng confidential funds ng OVP, kabilang ang papel ng mga itinalagang SDO at iba pang opisyal na sangkot sa kanilang pag-disburse.
MANILA, Philippines — Binatikos sa social media si Dimasalang National High School Principal Randy Emmanuel V. Bulanon dahil sa ilang post na naglalaman umano ng mapanirang at mapanuyang pahayag laban kina Akbayan Party-list Rep. Jose Manuel “Chel” Diokno, abogado Jesus Falcis, at dating mambabatas Percival “Perci” Cendaña.
Noong Linggo, Agosto 23, nagbanta si Falcis na magsampa ng administrative complaint laban kay Bulanon sa Department of Education (DepEd), matapos umano niyang makita ang isang post ng principal na aniya’y maaaring lumabag sa Safe Spaces Act.
“Randy Emmanuel Villar Bulanon, alam mo ba na violation ng Safe Spaces Act yung pinost mo na gusto mong mangyari sakin under the section Gender Based Online Sexual Harassment? Principal ka. I will file an admin complaint before the Dep Ed,” pahayag ni Falcis sa social media.
Sa isang post, isinulat umano ni Bulanon ang “Jesus Falcis.. Lobutin,” na tumutukoy sa isang bastos at sekswal na ekspresyong Cebuano na ipinukol sa abogado.
Sa isa pang post, ibinahagi naman ni Bulanon ang larawan ni Diokno at isinulat ang: “Rep. Chel, 80% gusto..matanggal ang IPIN mo..dahil minamalas ka kasing maging Senador..baka mali lang pagka relay sayo.”
Lumilitaw na tinutukoy ng post ang mga ngipin ni Diokno habang binabanggit ang dati nitong hindi matagumpay na mga pagtatangka na makakuha ng puwesto sa Senado.
Nagbahagi rin si Bulanon ng larawan ni Cendaña kasama ang isang caricature ng dating mambabatas, na sinamahan ng caption na: “Pag pina ‘auction’ ang painting/drawing na to..Malamang malaki kikitain nang Artist.”
Samantala, muling nagpahayag si Falcis tungkol kay Bulanon at binigyang-diin ang posisyon nito bilang school principal.
“Nagparamdam na si tweety bird. Sir Randy Emmanuel Bulanon was promoted to Principal III last year June 2025. Baka hindi na sya umabot at makapag celebrate ng second year anniversary niya,” ani Falcis.
Nanawagan din ang content creator na si Lovely Granada sa DepEd na kumilos kaugnay ng isyu.
“Purge out the rotten ones from the teaching force. Maraming mga guro na masipag at matitino ang mas karapat-dapat bigyan ng parangal at pagkilala,” pahayag ni Granada.
Samantala, hindi na ma-access ang social media account ni Bulanon nitong Lunes. Hindi agad malinaw kung ito ay kanyang na-deactivate, dinelete, o kung hindi na lamang ito available sa publiko.
Sa oras ng pagsulat, wala pang pampublikong pahayag si Bulanon o ang DepEd hinggil sa banta ni Falcis na magsampa ng administrative complaint.
Humingi ng paumanhin si Teacher Zenith Enriquez kay Usec. Claire Castro kaugnay ng kaniyang viral na post na umano’y naglaman ng pahayag na maaaring ituring na banta laban sa opisyal.
Sa kaniyang pahayag, nilinaw ni Enriquez na wala siyang intensiyong manakot, manakit o mambabaril. Inako rin niya ang buong responsibilidad sa kaniyang naging aksyon.
“Gusto ko lang pong humingi ng paumanhin sa nagawa ko sa inyo [Usec. Claire Castro]. Wala po akong ibig na ipahiwatig na mambabaril po ako. From the bottom of my heart, sorry talaga sa nagawa ko,” ani Enriquez.
Aminado ang guro na mali ang kaniyang ginawa at nauunawaan niyang maaari itong nakaapekto o nakasakit sa mga nakabasa ng kaniyang post.
“I’m not making excuses or looking for someone to blame. I own what I did,” pahayag niya.
Binigyang-diin din ni Enriquez na hindi niya layuning saktan si Castro, lalo na ang paggamit ng anumang karahasan laban sa opisyal.
“But please do know that shooting someone was not my intention with the post,” dagdag niya.
Ayon sa guro, tinanggal na niya ang naturang post at gagawin niyang aral ang insidente upang maging mas maingat sa kaniyang mga susunod na pahayag at kilos.
“I take accountability for my actions, and I hope that, in time, my actions will speak louder than this apology,” aniya.
Hiniling din ni Enriquez sa mga nakabasa ng kaniyang pahayag na tanggapin ang kaniyang paghingi ng tawad. Kasabay nito, nakiusap siyang huwag nang idamay o padalhan ng anumang mensahe ang kaniyang pamilya kaugnay ng insidente.
